Th!nk – automjet elektrik norvegjez

Automjeti elektrik norvegjez me një emër interesant, Th!nk, do të fillojë të shitet në tregun amerikan qysh në vitin 2009, pasi që është treguar interesim solid për të, ndërsa qysh këtë vit ai është në shitje në Zvicër, Francë dhe në shtetet skandinave.
Në Amerikë janë zgjedhur si partnerë prodhuesi gjigant General Electric dhe prodhuesit e litium-jon baterive A123 dhe EnerDet, derisa për shitjen e veçantë është themeluar kompania Th!nk North America. Vitin e ardhshëm fillon të shitet edhe në Itali, Gjermani si dhe Britani të Madhe.






Th!nk është diç më i rëndë se 1.100 kilogramë, mund të arrijë shpejtësinë maksimale prej rreth 110 km/h, derisa autonomia me një mbushje të baterisë është rreth 190 kilometra. Mbi planet ambicioze të prodhuesit flet edhe fakti se është në plan edhe modeli i ri me pesë ulëse – Th!nk Ox.

Në Norvegji kushton rreth 20.000 euro, prandaj besojmë se tek ne nuk do të kishte shumë blerës të interesuar, përveç tek ata që janë shumë të pasur, dhe e bëjnë këtë për punë qejfi.