METODAT E TORTURËS – SI BËHET TORTURA?

Në parim, çdo gjë, duke filluar nga uji, elementet shtëpiake mund të shndërrohen në instrumente të torturës. Sidoqoftë, sot mjetet dhe metodat e torturës kanë përparuar në vend se të stagnojnë; dhe si rezultat kjo ka ndikuar në ngritjen e mizorisë dhe johumanitetit të tyre. Një numër i teknikave të torturës që përdoren shpesh, nuk lënë shenja të dukshme në trup, por gjithsesi kanë ndikim shumë të madh në organet e brendshme, sikurse edhe në integritetin psikik të viktimës. Në përgjithësi, metodat e torturës mund të klasifikohen në dy grupe kryesore: fizike dhe psikike.

Tortura fizike i shkakton viktimës dhimbje të mëdha dhe vuajtje të rënda. Në format më mizore ajo mund te sjell deri te gjymtimi, shëmtimi ose lëndime të përhershme. Metodat më të shpeshta të torturës përfshijnë rrahjen me kërbaç, objekte të metalit, gurë, kabëll, shkop, shqelmim, goditje dhe përplasje për muri. Të ashtuquajturat metoda “falaka” ose “phalange” (rrahja e viktimës në mënyrë të ashpër në shputat e këmbëve të tyre), përdoren shumë, sikurse edhe metoda e elektroshokut, e zhytjes në ujë, lidhjes dhe djegieve me cigare ose ekspozimi i viktimës në temperatura ekstreme të ulëta ose të larta.

Tortura psikike përfshin teknikat e deprivimit dhe rraskapitjes, siç janë, deprivimi nga ushqimi, uji, gjumi, pajisjet higjienike, deprivimi nga format e komunikimit siç janë izolimi ose pamundësia e kontaktimit me të burgosurit e tjerë ose të tjerët jashtë burgut, shtrëngimi ose kërcënimi përmes detyrimit të prezencës gjatë torturës së tjerëve, kërcënimi për ekzekutim, ose simulimi i ekzekutimt, poshtërimi dhe terrorizimi i vazhdueshëm etj. Po ashtu, dhuna seksuale shpesh përdoret sikurse metodë fizike ashtu edhe psikike për paaftësimin e viktimave. Të gjitha metodat e përdorura janë goditje e rëndë për dinjitetin e qenieve njerëzore dhe shkeljen e të dejtave të tyre. Bota e lirë nga tortura nënkupton botën e lirë nga shkaktimi i qëllimshëm i dhimbjes dhe përdorimit të mjeteve mizore nga një person ndaj tjetrit.